ಬಾಳಿನ ದೀಪಗಳು

ಉರುಳಿ ಹೋದವು
ಒಂದೊಂದು ದಿನಗಳು
ಕಾಲ ಚಕ್ರದಡಿಗೆ ಸಿಲುಕಿ
ಕಾಣದಾದವು
ನೆನಪನಷ್ಟೇ ಉಳಿಸಿದವು...!

ಜೀವನದ ಈ ಏಕತಾನತೆಯ
ದೂರ ಸರಿಸಿ ಹೊಸತನ ತುಂಬಲು
ಬಂದಿದೆ ಈ ದೀಪಾವಳಿ
ಸಂಭ್ರಮದ ಬಳುವಳಿಯ ಹೊತ್ತು...!

ಬಾಳಿನ ಈ ಪಯಣದಲಿ
ಅದೆಷ್ಟು ದೀಪಗಳು !
ಮನೆ-ಮನದ ತುಂಬಾ
ಅವರದೇ ಪ್ರತಿ ರೂಪ
ಸುಡುವ ನೋವಿಗೆ ತಣ್ಣನೆಯ ಲೇಪ...!

ಜೀವ ಕೊಟ್ಟು ಸಾಕಿ ಸಲಹಿದ
ಅಪ್ಪ - ಅಮ್ಮನೆಂಬ ಜೋಡಿದೀಪ
ಮಕ್ಕಳೆಂಬ ನಂದಾದೀಪ
ವಿದ್ಯೆ ಕಲಿಸಿದ ಗುರು ದೀಪ
ಬಾಳ ಬೆಳಗುವ ಗೆಳೆಯನೆಂಬ ದೀಪ
ಭಾವ ಹಂಚಿಕೊಳಲು ಸ್ನೇಹವೆಂಬ ದೀಪ..!

ಈ 'ದೀಪ' ಗಳೆಲ್ಲವೂ ಬೆಳಗುತಿರಬೇಕು
ಆರಿ ಹೋಗದಂತೆ ಸದಾ ಕಾಯಬೇಕು...
ಆಗ ಕಾಡದೆಂದೂ ಕತ್ತಲು...
ಬೆಳಕೆ ಇರುವುದು ಸುತ್ತಲೂ....

ಅರುಣಾ ಜಿ ಭಟ್
ಬದಿಕೋಡಿ