ಮಾಮರದ ಕಥೆ-ವ್ಯಥೆ

ವಿಶಾಲವಾಗಿ ಹರಡಿದ್ದ ಬೃಹದಾಕಾರದ ಮಾಮರ

ಮರದ ಕೊಂಬೆಯಲ್ಲಿ ಕುಳಿತಿದ್ದ ಜೋಡಿ ಹಕ್ಕಿಗಳೆರಡು 

"ಟುವ್ವೀ...  ಟುವ್ವೀ... " ಎಂದು ರಾಗವಾಗಿ ಉಲಿಯುತ್ತಾ 

ಸರಸ-ಸಲ್ಲಾಪದಲ್ಲಿ ಮಗ್ನವಾಗಿದ್ದವು 

"ಹೂಂ... ನೀವಿನ್ನು ನನ್ನ ಮೈಯ ಮೂಲೆಯಲ್ಲೆಲ್ಲಾದರೂ 

ಗೂಡು ಕಟ್ಟಬೇಕು, ನಂತರ ಮೊಟ್ಟೆಗಳು-ಮರಿಗಳು,

ಅವುಗಳನ್ನು ತಿನ್ನಲು ಬರುವ ಹಾವುಗಳು... 

ಇಂತದ್ದನ್ನೆಲ್ಲಾ ನಾನು ನೋಡಿದ್ದಕ್ಕೆ ಲೆಕ್ಕವೇ ಇಲ್ವಲ್ಲಾ!

ಇನ್ನು ಎಷ್ಟೆಲ್ಲಾ ನೋಡಲಿರುವೆನೋ... "  ಎಂದುಕೊಂಡು 

ಮಾಮರ ಕುಲು-ಕುಲುನೆ ನಕ್ಕಿತು. ಕುಲುಕಾಟಕ್ಕೆ 

ಒಂದಷ್ಟು ಎಲೆಗಳು ನೆಲಕ್ಕೆ ಬಿದ್ದವು!

ಮಾಮರದ ಬುಡದಲ್ಲಿ ಬೃಹದಾಕಾರದ ಮರಗಳನ್ನು 

ಕೆಲವೇ ಕ್ಷಣಗಳಲ್ಲಿ ಧರೆಗುರುಳಿಸಬಲ್ಲ 'ದೈತ್ಯ' ಶಕ್ತಿಯ 

ಯಂತ್ರವನ್ನು ಹಿಡಿದುಕೊಂಡು ಮಾನವರಿಬ್ಬರು ನಿಂತಿದ್ದರು;

ತಮಗೆ ತೊಂದರೆಯಾಗದಂತೆ ಯಾವ ಕಡೆಗೆ ಮರವನ್ನು 

ಉರುಳಿಸಬೇಕು ಅಂತ ಯೋಚಿಸುತ್ತಿದರು.... 

- ಅರುಣಾ